అమెరికాలోని షార్లెట్‌లో ‘షార్లెట్‌ తెలుగు సంబరాలు–2026’ వేడుకలు ఘనంగా నిర్వహించారు. చిన్నారులు, యువత, పెద్దలు ప్రదర్శించిన శాస్త్రీయ సంగీతం, నృత్యాలు, ఫ్రీస్టైల్‌ డ్యాన్స్‌ ప్రేక్షకులను అలరించాయి. సైన్స్‌ ఫెస్ట్‌ ప్రత్యేక ఆకర్షణగా నిలిచింది. తొమ్మిది శాస్త్రీయ అంశాలను ప్రయోగాలు, ప్రదర్శనల ద్వారా చిన్నారులకు పరిచయం చేశారు. డ్రై ఐస్‌ ప్రయోగాలు, ప్లాస్మా బాల్‌ ప్రదర్శనలు విశేషంగా ఆకట్టుకున్నాయి.

తానా, జీటీఏ, ఆప్టా తదితర తెలుగు సంస్థలు ఈ వేడుకల్లో భాగస్వాములయ్యాయి. నాట్స్‌ అధ్యక్షుడు రాజ్‌ అల్లాడా కార్యక్రమానికి హాజరయ్యారు. ఈ సందర్భంగా 800 కొత్త రిజిస్ట్రేషన్లు నమోదైనట్లు నిర్వాహకులు తెలిపారు. కార్యక్రమ విజయానికి సహకరించిన కళాకారులు, చిన్నారులు, తల్లిదండ్రులు, వాలంటీర్లు, స్పాన్సర్లు, సంస్థల ప్రతినిధులు, ప్రేక్షకులకు కృతజ్ఞతలు తెలిపారు.

ఇదిలా ఉండగా, తెలుగు భాష, సంస్కృతుల పరిరక్షణతో పాటు సేవా కార్యక్రమాలను విస్తరించడం, యువతను సామాజిక సేవలో భాగస్వాములను చేయడం లక్ష్యంగా నార్త్‌ అమెరికన్‌ తెలుగు సొసైటీ (నాట్స్‌) మిషిగన్‌ చాప్టర్‌ను ఫార్మింగ్టన్‌ హిల్స్‌లో ప్రారంభించారు. చాప్టర్‌ కోఆర్డినేటర్‌గా శ్రీదేవి మణేపల్లి, జాయింట్‌ కోఆర్డినేటర్‌గా మహి బొల్లవరం నియమితులయ్యారు. రవి చాలంటి ఈవెంట్స్‌, లాజిస్టిక్స్‌ బాధ్యతలు, హేమ సూరపరాజు ట్రెజరర్‌గా, జ్యోతి జవ్వాది సభ్యత్వ బాధ్యతలు, అనుపమ దివాకర్ల ప్రజా సంబంధాలు, మీడియా బాధ్యతలు నిర్వహించనున్నారు.

నాట్స్‌ చైర్మన్‌ కిషోర్‌ కంచర్ల సంస్థ హెల్ప్‌లైన్‌ సేవలను, ఆపదలో ఉన్న తెలుగు వారికి అందిస్తున్న సహాయ సహకారాలను వివరించారు. నాట్స్‌ అధ్యక్షుడు రాజ్‌ అల్లాడా మాట్లాడుతూ, తెలుగు సమాజానికి సేవ చేయడంలో సంస్థ ఎల్లప్పుడూ ముందుంటుందని తెలిపారు.

ఈ సందర్భంగా మనోరమ గాంధీ, కూచిపూడి కళా ప్రోత్సాహకురాలు సంధ్య శ్రీ ఆత్మకూరి, తెలుగు భాషా కార్యక్రమం మనబడి ప్రతినిధులు, సామాజిక సేవకుడు సన్నీ రెడ్డి, వైద్య, సినీ రంగాల్లో సేవలందిస్తున్న డాక్టర్‌ హరినాథ్‌ పోలిచెర్లను సత్కరించారు. స్థానిక విద్యార్థులు ప్రదర్శించిన కూచిపూడి నృత్యాలు ప్రత్యేక ఆకర్షణగా నిలిచాయి. ఆప్టా, డెట్రాయిట్‌ తెలుగు అసోసియేషన్‌, డెట్రాయిట్‌ తెలంగాణ కమ్యూనిటీ, ఇండియన్‌ ఓవర్సీస్‌ కాంగ్రెస్‌ ప్రతినిధులు కార్యక్రమంలో పాల్గొన్నారు.

మహిళల ఆరోగ్యం, సాధికారత, యువ నాయకత్వం, క్రీడలు, కుటుంబ కార్యక్రమాలు, తెలుగు భాషా సంస్కృతుల పరిరక్షణకు ప్రాధాన్యమిస్తూ ప్రతి మూడు నెలలకు కనీసం ఒక ప్రధాన సామాజిక సేవా కార్యక్రమాన్ని నిర్వహించాలని మిషిగన్‌ చాప్టర్‌ నిర్ణయించింది.
పీఆర్వో: జీకే మీడియా గణేష్‌ కుమార్‌

షార్లెట్‌లో తెలుగు సంబరాలు.. మిషిగన్‌లో నాట్స్, NATS Michigan Chapter